મારો પરિચય

મારું જીવન સુરત અને અમરેલી વચ્ચે ઘડાયું. ભણતર ચાલુ રાખવા બીજાના ઘરે રહેવું પડ્યું, અને ત્યાં જ સમજાયું કે જવાબદારી ઉંમર જોઈને નથી આવતી. એ દિવસોએ મને અંદરથી મજબૂત બનાવી.

BBA અને MBA (ફાઇનાન્સ) પૂરું કર્યા પછી 2015થી ત્રણ વર્ષ ધોરણ 11 અને 12 કોમર્સના વિદ્યાર્થીઓને ભણાવ્યા. ત્યાર બાદ સુરતની એક શાળામાં એકાઉન્ટન્ટ તરીકે જોડાઈ. દિવસ આખો આંકડા સાથે જાય, પણ મન તો શબ્દોમાં જ રમતું.

રોજ લખવું મારા માટે શ્વાસ લેવા જેવું સહજ છે. 50થી વધુ ટૂંકી વાર્તાઓ લખી છે, ગીતો, ગઝલો અને સાચી ઘટનાઓ પરથી લખાણ પણ. દસથી વધુ ડાયરીઓ ભરાય એટલું લખાણ હજુ વાચકો સુધી પહોંચવાનું બાકી છે. ફેબ્રુઆરી 2020માં પહેલી લઘુનવલ પ્રકાશિત થઈ, અને સાત પુસ્તકોમાં સહલેખિકા તરીકે કામ કરવાનો મોકો મળ્યો.

આજે Instagram, Facebook, YouTube અને પ્રતિલિપિ પર લાખો લોકોનો પરિવાર મારી સાથે છે. યુવાનો અને પરિવારો સાથે વક્તવ્યો, કૉલમ લેખન અને બાળકો માટે શાળાની શરૂઆત, આ બધું એક જ સપનામાંથી આવે છે: લોકોના વિચાર થોડા વધુ સુંદર બને.